#شعر | رجا القحطاني: ركاب الشيب

ليت الزمن يوقف قبِل عمر ستين
أو ليت يجتاز المِيَه عمر الانسان
ومعاي صحه  جيده  لكن  مْنين
خوفي من الشيخوخه وضعف الامكان
حب الحياه وقرب الأهل العزيزين
رغبه  غريزيه  ولو  الزمن  شان
نهاية  الرحله   مصير  الملايين
أدري   ولكن  ليت  تتْأجل أزمان
ماخاف منها حيل، يسندني الدِّين
الخوف الأكبر طيحة الجسم عجزان
واصبح عليهم ثقل لو هم وفيين
وانا صدىَ الماضي وهم نبتة الآن
لا جا المشيب وراح ركب الصبا .. وين؟
تاخذني الذكرى  على  كل  ماكان
الشيب له قدرٍ على الراس والعين
لكن منو فينا على الشيب شفقان
وين الصحاري من خضار البساتين؟
وين الدجا  من طلة الصبح شتان
عشت الحياه وفاتت سْنين وسْنين
تقول  خطفة  برق في مزنته بان
تدني ركاب الشيب واقول بعدين
أركض ورا  دنياي والهث وعطشان
ولا دريت الّا وهي هادفه .. لين
بين النواصي نوّخت دون حسبان
ياقصر فتره  بين مافات والحين
وياطول فجوه بين وهمٍ  وبرهان
يارب  تغفر لي خطاياي  وتْعين
مؤمن وفي صدري تشرّبت الايمان
ماني ب كامل .. لك كمال المضامين
عزاي  بك آمنت من قلب  ولْسان